ကျမ်းပယ်ဆိုတာဘာလဲ။ (အပိုင်း (၁)) // What is the APOCRYPHA?

 

အပိုင်း (၁)

 ကျမ်းပယ်ဆိုတာဘာလဲ။

ထိုကျမ်းပယ်များက အမှန်တကယ် ကျမ်းစာအုပ်များ ဖြစ်ကြသလား။ 

 ဘာသာတိုင်းမှာ ကျမ်းဂန်စာစောင်ဆိုတာ အသီးသီးရှိကြပါတယ်။ ထိုကျမ်းဂန်စာစောင်များကို မှီတည်ပြီး အယူဝါဒ ခံယူချက်အမျိုးမျိုးကို လိုက်ကြပြီးနောက် အချို့သောသူများက ရေးသားထားသည့် ကျမ်းစာများကို ထပ်မံ ဖြည့်စွက်တတ်ကြပါတယ်။ ထိုကဲ့သို့ ထပ်မံဖြည့်စွက်ရေးသားခြင်း များကြောင့် ကျမ်းဂန်များစွာ ဖြစ်ပေါ်လာပါတယ်။ ထိုသို့ ‌ရေးချင် တိုင်းရေး ဖြည့်ချင်တိုင်းဖြည့်ထားတဲ့စာစောင်များကို ကျမ်းဂန်အဖြစ် သတ်မှတ်ပေးလို့ မရပါဘူး။ သတ်မှတ်၍မရသောကြောင့် ကျမ်းဝင်များမဖြစ်နိုင်သောကြောင့် ရေးသားသူများက ကျမ်းအဖြစ် သတ်မှတ်သော်ငြား ဘာသာတစ်ခုလုံးကို ကိုယ်စားပြုဖော်ပြသည့်ကျမ်းများ အဖြစ်တော့ ထည့်သွင်းသတ်မှတ် ဖော်ပြ၍ မရပါ။ ထို့ကြောင့် ကျမ်းပယ်များဆိုတာ ဖြစ်ပေါ်လာခြင်း ဖြစ်ပါတယ်။

 များစွာသော Apocrypha ခေါ် ကျမ်းပယ်များကို ကနဦးအသင်းတော်များက အသုံးဝင်သည်ဟု သတ်မှတ်ခဲ့‌သော်လည်း မှုတ်သွင်းတော်မူခြင်းခံရသော ကျမ်းများအဖြစ် သတ်မှတ်ထားခဲ့ခြင်း မရှိပေ။ မဿဲ၊ မာကု၊ လုကာ၊ ယောဟန်တို့ကို ကျမ်းတော်ဝင် သတင်းကောင်းစာစောင်များအဖြစ် ကနဦးအသင်းတော်များ သတ်မှတ်ထားခဲ့ခြင်းမှာ တိကျမှုရှိခြင်း၊ အခွင့် အာဏာပြည့်ဝခြင်း နှင့် ယေရှုခရစ်တော် သင် ကြားခြင်းများနှင့် အသက်ရှင်ခဲ့စဥ် ကာလအကြောင်းများကို ဘုရားသခင်မှ မှုတ်သွင်းဖော်ပြထားခဲ့သောကြောင့် ဖြစ်သည်။ ဤကျမ်းလေးစောင်အပြင် ယေရှုခရစ်တော် ပြုတော်မူခဲ့သည့် အကြောင်းများကို ဖော်ပြရေးသားထားသည့် အခြားသောကျမ်းမြောက်များစွာ ထွက်ပေါ်လာခဲ့သော်လည်း ယေရှုခရစ်တော်၏ သင်ကြားခြင်းနှင့် ဘဝဖြစ်စဥ်အကြောင်းအရာများကိုပင် မှတ်တမ်းရေးသားဖော်ပြထားသည်မှာ တိကျမှုမရှိခြင်း၊ အခွင့်တန်ခိုး အာဏာ ပြည့်ဝမှုမရှိခြင်း (သို့) မှုတ်သွင်းတော်မူခြင်း မခံထားရ‌သောကြောင့်ဖြစ် သည်။

 အချို့သောသူများက ထိုကျမ်းပယ်များကို ပျောက်ဆုံးနေသော သမ္မာကျမ်းများဟုလည်းဆိုကြသည်။ သမ္မာကျမ်းစာတွင် ပျောက်ဆုံးနေသည့် ကျမ်း စာစောင်များမရှိပေ။ ကျမ်းဝင် သတ်မှတ်၍မရသောကြောင့် ငြင်းပယ် ထားသည့် ကျမ်းမျာသာ ရှိသည်။ ပျောက်ဆုံးနေသောကျမ်းများဟု ဆိုရခြင်းမှာ ဤကျမ်းစာစောင် များသည်လည်း သမ္မာကျမ်းစာကို ရေးသားနေသည့်အချိန်ကာလတွင် ထွက်ပေါ် လာသည့် ရာပေါင်းများစွာထဲမှ စာအုပ်များထဲတွင် ပါဝင်နေသောကြောင့် ဖြစ်သည်။ အချို့သောသူများကလည်း ဆိုကြသည်မှာ ကျမ်းစာအုပ်က (၆၆) အုပ်ပဲလား။ (၁၆၆) အုပ် မဟုတ်ဘူးလား။ (၂၆) အုပ်ပဲရှိရမှာ မဟုတ်ဘူးလား အစရှိသဖြင် မေးတတ်ကြပါတယ်။ မဟုတ်ဘူးလို့သာ ဖြေရမည်ဖြစ်သည်။ အဘယ့်ကြောင့်ဆိုသော် ကျမ်းစာအုပ် (၆၆) အုပ်အပြင်အခြားသော စာအုပ်များသည် ဘုရားသခင်မှ ပြောသောစကားများမဟုတ်ပဲ လူမှပြောသာစကားများဖြစ်ပြီး လှည့်စားမှုများရှိနေသော ကြောင့်ဖြစ်သည်။ ထို (၆၆) အုပ်သည်လည်း ဘုရား သခင်သည် ရေးသားမည့်လူများကို ရွေး ကောက်ပြီး မှုတ်သွင်းရေးသားထားခြင်း ဖြစ်သည်။

 စကားလုံးအရလေ့လာရမည်ဆိုပါက - Apocrypha ဟုခေါ်သည့် စကားလုံးသည် ဂရိစကားလုံးမှလာပြီး Hidden or Secret “ဖုံးကွယ်ထားသော (သို့) လျှို့ဝှက်ထားသော” ဟူသည့် အဓိပ္ပာယ်ဖြစ်ပါသည်။ Apocrypha ဟူသော စကားလုံးသည် အများကိန်း အဓိပ္ပာယ်ဖြစ်ပြီး၊ အနည်းကိန်းမှာ Apocryphan ဖြစ်သည်။ apo ( away) ဆိုသည့် စကားလုံးနှင့် krytein (hide or conceal) ဆိုသည့်စကားလုံးကို ပေါင်းစပ်ကာ ဖြစ်ပေါ်လာသည့် စကားလုံးဖြစ် သည်။ ဤစကားလုံးကို မူရင်း အသုံးပြုခဲ့စဥ်က ဆိုလိုသည့်အဓိပ္ပာယ်မှာ အလွန်ကြောက်စရာကောင်းသည့် စာများရေးသားသည့် စာအုပ်များနှင့် လူထုလက်ခံနိုင်ဖို့ရန် ကြီးကျယ် မြင့်မြတ်သည့်၊ အချို့သော လူများလက်ဝယ်မရောက်ရှိသင့်သည့် စာအုပ်များကို သီးသန့်ခွဲခြား ထားကာ ထိန်းသိမ်းစောင့်ရှောက်ထားသည့် စာအုပ်များဟူ၍ ဆိုလိုရင်းဖြစ်ခဲ့သည်။

 သို့သော် အချိန်ကာလ ကြာမြင့် လာသည်နှင့်အမျှ - “Apocrypha” ဆိုသောစကားလုံးသည် မူလကျမ်းစာစောင်များနှင့်ကွဲကာ မေးခွန်း ထုတ်စရာများနှင့် သံသယဖြစ်ဖွယ်ကျမ်းစောင် များဖြစ်ကာ ကျမ်းစာစောင်အဖြစ် လက်ခံ၍မရသော စာအုပ်များ ကိုခေါ်ဆို ရည်ညွှန်းရာတွင် အသုံးပြုခြင်း ခံခဲ့ရ သည်။ နှောင်းပိုင်းတွင် Apocrypha ဟူသော စကားလုံး၏ ယေဘုယျအသုံးမှာ “ မှားယွင်းသော၊ ဆိုးသော၊ မိစ္ဆာဒိဌိ ဖြစ်သော၊ မူရင်းဇစ်မြစ်မှန်ကန်မှုမရှိပဲ အတု

အယောင် ဖြစ်သော” ဟူသောစကားလုံး အဓိပ္ပာယ်များဖြစ် သုံးစွဲလာကြသည်။ ကျမ်းစာစောင်အဖြစ် သတ်မှတ်လက်ခံ၍ မရ‌သော ကျမ်းပယ်များကို လက်ခံသောသူများက Deuterocanon ဟု ခေါ်ကြသည်။ Deuterocanon ကျမ်းသည် သမ္မာကျမ်းစာ၏ အစိတ်အပိုင်း တစ်ခုဖြစ်သည်ဟု Orthodox နှင့် Catholic အသင်းတော်များက ဆိုကြသည်။ သို့သော် protestant များကတော့ လက်မခံပေ။ ကျမ်းပယ်အဖြစ် သတ်မှတ်ထားသည်။ Merriam-Webster Dictionary အရဆိုရလျှင် Septuagint ထဲတွင် ပါဝင်ခဲ့သော်လည်း Hebrew ကျမ်းစောင်တွင် မပါဝင်သော စာစောင်များဖြစ်သည်။ ဒုတိယကျမ်းစာအုပ်များဟု သတ်မှတ်၍ ရသည်။

 Apocrypha ဟူသော ဝေါဟာရသည် pseudepigrapha ဟူသောဝေါဟာရနှင့် အလွန်နီးစပ်သော စကားလုံးတစ်ခုလည်းဖြစ်ပြီး မှားယွင်းစွာရေးသားသည်ဟု လိုဆိုသည်။ (pseudes + epi + graphe = (false + to write upon) ဟူ၍ဖြစ်သည်။ ဤ pseudepigrapha သည်လည်း ဂျူးလူမျိုးများရေးသားခဲ့သော စာစောင် များနှင့် တစ်ချိန်တည်းတွင် ရေးသားထားသောကျမ်းများဖြစ်ပြီး မည်သူရေးသားခဲ့သည်ကို အတိအကျ မဆို နိုင်ပေ။ ထိုကျမ်းများသည် Greco – Roman တစ်လျှောက်တွင်

Pagan စာစောင်များကဲ့သို့ ဂျူး၊ ခရစ်ယာန် တို့ထံတွင် ပျံ့နှံ့ခဲ့သည်။ ထိုကျမ်းစာအုပ်အမည်များကို သမ္မာကျမ်းစာတွင် ဖော်ပြထားသည့် နာမည်များကို ယူငင်သုံးစွဲကာ ကျမ်း၏နာမည်များကို အာဒံ၊နောဧ၊ ဧနောက်၊ အာဗြံဟံ၊ မောရှေ၊ ဧလိယ ၊ ယေဇကျေလ၊ ယေရ မိ၊ Baruch အစရှိသဖြင့် အမည်တပ်ထားသည်။ pseudepigrapha ကျမ်းသည် Apocrypha ကျမ်းများနှင့် ယေဘုယျအချက်အလက်များတူညီပြီး သမ္မာကျမ်းစာအဖြစ် သတ်မှတ်ခြင်းမခံရသည့်စာအုပ်များလည်း ဖြစ် သည်။အားလုံးသော ကျမ်းပယ်များနှင့် pseudepigrapha အများစုတို့ကို ဂျူးလူမျိုးများမှသာ ရေးသားခဲ့ကြ သည်။

..........................

- မေတ္တာဖြင့်

- ပိုင်စိုးကိုကို

(#The_Shine Team)